Próiseas Roghnúcháin

Is painéal de ghairmithe scannánaíochta na hEorpa é Painéal Roghnúcháin LUX. Roghnaíonn an Painéal na cúig scannán do Ghradam Lucht Féachana LUX ó líon ollmhór de scannáin incháilithe.  Is féidir le gach ball den phainéal roghnúcháin dhá scannán a mholadh le haghaidh ainmniúcháin. Tagann Painéal Roghnúcháin LUX le chéile sa Bhruiséil i mí an Mheithimh gach bliain do chruinniú dhá lá.

Critéir incháilitheachta 

Chun go measfaí iad do Ghradam Lucht Féachana LUX, ba ghá do gach scannán na critéir seo a leanas a shásamh:

Ginearálta:

• Ní mór go mbeadh duais nó aird shuntasach faighte aige ag mórfhéile.
• Ní mór go mbeadh sé díolta nó seolta i bpictiúrlanna i gcúig Bhallstát den Aontas ar a laghad (nó gur díoladh a chearta i mBallstát amháin den Aontas ar a laghad i gcás scannáin ó Fhéile Scannán Cannes).
• Ní mór gur taispeánadh go poiblí den chéad uair é ag féile, i bpictiúrlann nó ar líne idir an 1 Iúil den bhliain roimhe sin agus deireadh mhí Bealtaine na bliana reatha.

Topaicí:

• Éagsúlacht na n-ábhar atá ag croílár na díospóireachta Eorpaí, chomh maith le luachanna na hEorpa a léiriú, agus malartú a mholadh idir Feisirí Pharlaimint na hEorpa agus saoránaigh maidir le saincheisteanna a mbíonn tionchar acu ar shaol laethúil na hEorpa agus ar thodhchaí na hEorpa.   
• An comhionannas, an éagsúlacht, an daonlathas agus an cuimsiú a léiriú go rathúil trí thopaicí agus trí charachtair an scannáin.
• Ionadaíocht a dhéanamh a mhéid is féidir, ar na hábhair a chlúdaítear in obair reachtach an Aontais Eorpaigh. 
• A bheith inrochtana do lucht féachana Eorpach leathan agus éagsúil, lena n-áirítear daoine óga. 
• Spreagtar éagsúlacht tuine agus seánra.

Tionscnamh geografach an léiriúcháin:

Ní mór don scannán a bheith léirithe nó comhléirithe i dtíortha atá incháilithe do chlár MEDIA ó Eoraip na Cruthaitheachta (Ballstáit AE, an Albáin, an Airméin, an Bhoisnia agus an Heirseagaivéin, an tSeoirsia, an Íoslainn, an Chosaiv, an Mholdóiv, Montainéagró, an Iorua, an Mhacadóin Thuaidh, an tSeirbia agus an Úcráin).

Seánra:

Ficsean, beochan agus scannán faisnéise.

Am ionnalta:

Bíodh am ionnalta 60 nóiméad ar a laghad i gceist. Ba cheart go seachnófaí, a mhéid agus is féidir, scannáin atá os cionn 120 nóiméad ar fhad.

I measc na ndaoine ar Phainéal Roghnúcháin LUX 2025, bhí léiritheoirí, dáileoirí, oibreoirí pictiúrlann, stiúrthóirí ealaíne agus clársceidealóirí féilte scannán agus ionadaithe de chuid 27 Times Cinema.

Bíonn ionadaithe do na príomh-chomhpháirtithe, Acadamh na Scannán Eorpach, an Coimisiún Eorpach/clár Eoraip na Cruthaitheachta agus Europa Cinemas páirteach sa phainéal mar bhreathnóirí.

Ba é Michael Downey OBE, Cathaoirleach Acadamh na Scannán Eorpach, an tUachtarán Oinigh a bhí i mbun cathaoirleachta ar Phainéal Roghnúcháin LUX 2025.