Gradam Lucht Féachana LUX
Cad is cúis le Gradam Lucht Féachana LUX?
Eagraíonn Parlaimint na hEorpa agus Acadamh na Scannán Eorpach 'LUX – Gradam Scannánaíochta Lucht Féachana na hEorpa (gearrtheideal: Gradam Lucht Féachana LUX)', i gcomhar le clár MEDIA Eoraip na Cruthaitheachta agus Europa Cinemas. Tarraingíonn an Gradam sin aird ar thiomantas Pharlaimint na hEorpa don chultúr agus don oideachas, trí thacú le scannánaíocht na hEorpa agus trí éagsúlacht chultúrtha a chur chun cinn.
Tá an Gradam ainmnithe as an bhfocal Laidine lux, rud a chiallaíonn solas. Tarraingíonn na scannáin ainmnithe aird ar na saincheisteanna sóisialta agus polaitiúla atá ann faoi láthair, spreagann siad lucht féachana a bheith páirteach i ndíospóireachtaí faoin Eoraip ar shlí a thugann ábhar machnaimh dóibh agus a léiríonn áilleacht agus éagsúlacht scannánaíocht na hEorpa.
Mar thoradh ar an tionscnamh seo, beidh na scannáin ainmnithe níos feiceálaí agus cuideofar leo dul thar theorainneacha agus teacht ar lucht féachana níos leithne. Tugann sé deis do lucht féachana ó gach cearn den Aontas Eorpach, agus níos faide i gcéin, féachaint ar scannáin nach mbeadh ar taispeáint ina dtíortha murach sin b’fhéidir.
Tá baint ag scannáin ainmnithe Ghradam Lucht Féachana LUX le lucht féachana na hEorpa agus spreagann siad díospóireachtaí faoi luachanna na hEorpa. Láidríonn an Gradam an nasc idir an pholaitíocht agus daoine trí chuireadh a thabhairt do lucht féachana na hEorpa páirt ghníomhach a ghlacadh sa phlé agus an buaiteoir a roghnú trí cheann amháin nó níos mó de na scannáin ainmnithe a rátáil.
Conas a roghnaítear an buaiteoir?
Fógraíodh na cúig scannán atá ar an ngearrliosta don chúigiú heagrán de Ghradam Lucht Féachana LUX go poiblí an 18 Meán Fómhair 2024 i bParlaimint na hEorpa. Bhí Feisirí de Pharlaimint na hEorpa, lucht féachana, scannánóirí agus gairmithe scannánaíochta i láthair.
Is féidir leis an bpobal agus le Feisirí de Pharlaimint na hEorpa araon rátáil a thabhairt do na scannáin ar líne. Buafaidh an scannán a gheobhaidh an scór iomlán is airde, arna rátáil ag an bpobal agus ag Feisirí (meáchan rátála comhionann de 50% an ceann) Gradam Lucht Féachana LUX. Fógrófar an buaiteoir ag Searmanas Ghradam Lucht Féachana LUX, a tharlóidh i bParlaimint na hEorpa in Aibreán 2025 (dáta le deimhniú).
Duais Scannánaíochta LUX (2007-2019) - Cad ba Dhuais Scannánaíochta LUX ann?
Bhronnadh Parlaimint na hEorpa Duais Scannánaíochta LUX, a bunaíodh in 2007, gach bliain, go dtí go ndeachaigh an institiúid i gcomhar le hAcadamh na Scannán Eorpach agus gur thug siad Gradam Lucht Féachana LUX isteach in 2020.
Faoi chuimsiú Dhuais Scannánaíochta LUX, rinneadh fotheidealú ar thrí scannán a chuir an Painéal Roghnúcháin ar an ngearrliosta in 24 theanga an Aontais Eorpaigh agus taispeánadh iad ar fud na hEorpa. Go dtí 2019, ní bhíodh ach Feisirí ábalta vótáil ar na scannáin a bhí ainmnithe agus roghnaítí an buaiteoir bunaithe air sin.